Microsoft og Tölvmiðlun hafa gert með sér samning um þróunarsamstarf sem er stærsti samningur sinnar tegundar sem Microsoft hefur gert við íslenskt hugbúnaðarhús.

Samstarf fyrirtækjanna var kynnt á ráðstefnu Tölvumiðlunar í Hörpu 18. nóvember 2011.

Samstarfssamningur þessi hefur verið á annað ár í vinnslu og hefur Tölvumiðlun notið aðstoðar starfsfólks Microsoft Íslandi við þá yfirgripsmiklu grunnvinnu sem nauðsynleg var til þess að gera samninginn að veruleika.

Grunnforsenda samningsins er að samstarfið skili hugbúnaði sem verður ríkari af virkni, með framtíðarhagsmuni notenda að leiðarljósi.

Um árabil hefur Tölvumiðlun notað þróunartól frá ýmsum birgjum til hugbúnaðargerðar auk gagnagrunna frá Oracle og íhluta frá öðrum birgjum, en með samningi félaganna nú, verður H3 heildarlausn í mannauðsmálum frá Tölvumiðlun flutt yfir á Microsoft SQL Server og mun Tölvumiðlun í kjölfarið reiða sig meira en áður á Microsoft lausnir við hugbúnaðargerð félagsins.

Á sama tíma hafa félögin samið við færustu gagngrunnssérfræðinga bandaríska upplýsingatæknifyrirtækisins DB-Best technologies, sem hafa verið fengnir til að hafa yfirumsjón með flutningi kerfanna yfir á Microsoft SQL.

Í samstarfi Microsoft og Tölvumiðlunar felast miklir möguleikar á útflutningi H3 lausnarinnar sem þróuð er hérlendis, en þess má geta að um árabil hefur launavinnsla Microsoft Íslandi verið framkvæmd í H3 launakerfi Tölvumiðlunar.

Að sögn stjórnenda Tölvumiðlunar er það mikil lyftistöng fyrir félagið og heiður að Microsoft skuli velja Tölvumiðlun til samstarfs, en í samningnum felst viðurkenning Microsoft á þróunarstarfi Tölvumiðlunar og gæðum þeirra lausna sem félagið býður hérlendis.